റമദാനിലെ ഒന്നാം സെമസ്റ്റർ ബിഎഡ് പരീക്ഷ, പ്രതിഷേധം ശക്തമാവുന്നു.
കാലക്കറ്റ് സർവ്വകലാശാല ഏപ്രിൽ 20 മുതൽ 26 വരെ ബി.എഡ് ഒന്നാം സെമസ്റ്റർ പരീക്ഷ ഉച്ചക്ക് 1.30 മുതൽ 4.30 വരെ പ്രഖ്യാപിച്ച് ടൈംടേബിൾ പ്രസിദ്ധീകരിച്ചിരിക്കുകയാണ്. റമദാൻ മാസത്തിലെ ഉച്ചക്ക് ശേഷമുള്ള പരീക്ഷകൾ വലിയ പ്രയാസത്തിലാക്കുമെന്നാണ് വിദ്യാർത്ഥികളുടെ അഭിപ്രായം. പരീക്ഷ കഴിഞ്ഞ് ഇഫ്താറിന് മുമ്പ് വീട്ടിലെത്താൻ പലർക്കും കഴിയില്ല. 4.30 ന് പരീക്ഷ അവസാനിക്കുന്നതും ഇപ്പോഴത്തെ പ്രത്യേക സാഹചര്യത്തിൽ യാത്ര സൗകര്യം സുഗമമല്ലാത്തതിനാലും ഇഫ്താർ യാത്രക്കിടയിൽ വെച്ച് നടത്തേണ്ട അവസ്ഥയുണ്ടാകുമെന്ന് വിദ്യാർത്ഥികൾ ഭയപ്പെടുന്നു. അധ്യാപകരെയും ഈ സമയക്രമം സാരമായി ബാധിക്കും.ഒന്നാം സെമസ്റ്റർ 2021 നവംബർ 22 നാണ് ആ രംഭിച്ചത്. ഭൂരിഭാഗം കോളേജുകളിലും പാഠഭാഗങ്ങൾ പൂർണ്ണമായും പഠിപ്പിച്ചിട്ടില്ല. പരീക്ഷക്ക് പുറത്തിറക്കിയ ടൈംടേബിളിൽ തുടർച്ചയായ ദിവസങ്ങളിലാണ് ക്രമീകരിച്ചിരിക്കുന്നത്. റമദാൻ കാലത്ത് ദൂരയാത്ര നടത്തി വീട്ടിൽ വന്ന് അടുത്ത പരീക്ഷക്ക് തയ്യാറെടുപ്പ് നടത്തുന്നതിൽ വലിയ ബുദ്ധിമുട്ടുകൾ വിദ്യാർത്ഥികൾക്ക് നേരിടേണ്ടി വരും.പരീക്ഷ റമദാന് ശേഷം മെയ് മാസത്തിൽ നടത്തണമെന്നാണ് ഇവരുടെ ആവശ്യം.ഇത് ഉന്നയിച്ച് സർവ്വകലാശാല അധികൃതർക്ക് അപേക്ഷ നൽകിയിട്ടുണ്ട്. തങ്ങളുടെ ആവശ്യങ്ങൾ സർവ്വകലാശാല അംഗീകരിക്കുമെന്നാണ് വിദ്യാർത്ഥികളുടെ പ്രതീക്ഷ.
