ലോക പൈതൃകങ്ങൾ കാത്തു സൂക്ഷിക്കാൻ മ്യൂസിയങ്ങൾ.....
ഖത്തർ മ്യൂസിയങ്ങൾ ഒരു ഖത്തർ ഗവണ്മെന്റ് സ്ഥാപനമാണ്. മ്യൂസിയം ഓഫ് ഇസ്ലാമിക് ആർട്ട്‌ (MIA), മത്താഫ് :അറബ് മ്യൂസിയം ഓഫ് മോഡേൺ ആർട്ട്‌, MIA പാർക്ക്, ഖത്താറയിലെ ഖത്തർ മ്യൂസിയം ഗാലറി, ALRIWAQ DOHA എക്സിബിഷൻ സ്പേസ്, അൽ സുബാറ വേൾഡ് ഹെറിറ്റേജ് സൈറ്റ് വിസിറ്റർ സെന്റർ തുടങ്ങിയ മ്യൂസിയങ്ങൾ ഖത്തറിൽ ഉടനീളമുള്ള പുരാവസ്തു പദ്ധതികൾ, ഓറിയന്റലിസ്റ്റ് കല, ഫോട്ടോഗ്രാഫി, സ്പോർട്സ്, കുട്ടികളുടെ വിദ്യാഭ്യാസം, വന്യജീവി സംരക്ഷണം എന്നിവയുൾപ്പെടെ വിവിധ പ്രവർത്തന മേഖലകളിൽ അതിന്റെ ശേഖരങ്ങൾ ഉയർത്തിക്കാട്ടുന്നു.
QM ടവർ - ഖത്തറിലെ ദോഹയിലെ ഖത്തർ മ്യൂസിയം 2005 ലാണ് സ്ഥാപിച്ചത്. ട്രസ്റ്റി ബോർഡാണ് ഖത്തർ മ്യൂസിയത്തിന്റെ മേൽനോട്ടം വഹിക്കുന്നത്. സാംസ്‌കാരിക -കല -പൈതൃക മന്ത്രാലയവുമായി സഹകരിച്ചു ഖത്തരി സാംസ്‌കാരിക നയങ്ങൾ നടപ്പിലാക്കുന്ന പ്രധാന സ്ഥാപനമാണ് ഖത്തർ മ്യൂസിയം.ഖത്തറിന്റെ സമഗ്ര വികസനം, പുരോഗതി, സമൃദ്ധി എന്നിവക്കായി ഖത്തറിന്റെ നാഷണൽ വിഷൻ 2030 പ്രോഗ്രാം നടപ്പിലാക്കുന്ന സംഘടനകളിലൊന്നാണ് ഖത്തർ മ്യൂസിയംസ്. പ്രാദേശിക സംസ്കാരത്തിന്നും പാരമ്പര്യത്തിന്നും ചുറ്റും ആധുനിക വൽക്കരണം, അറബ്, ഇസ്ലാമിക ഐഡന്റിറ്റി നിലനിർത്തുക, മറ്റ് സംസ്കാരങ്ങളോട് തുറന്ന മനസ് കാണിക്കുക എന്നിവയാണ് ലക്ഷ്യം. ഖത്തറിനെ ഒരു സാംസ്‌കാരിക ശക്തി കേന്ദ്രമാക്കി മാറ്റുക എന്നതാണ് ആത്യന്തിക ലക്ഷ്യം. എല്ലാറ്റിനുമുപരിയായി, ലോകമെമ്പാടുമുള്ള കലാ പദ്ധതികളുടെ ഒരു ഉത്തേജകമായ സാംസ്‌കാരിക പ്രേരകമായി QMA മാറണമെന്ന് ഖത്തർ ഗവണ്മെന്റ് ആഗ്രഹിക്കുന്നു. ഇത് യുനെസ്കോയുടെ കീഴിലുള്ള അറബ് ലീഗ് ഏറ്റെടുത്തതാണ്. യുനെസ്കോ വേൾഡ് ഹെറിറ്റേജ് കമ്മിറ്റിയിൽ 2011ൽ ഖത്തർ മ്യൂസിയം അതോറിറ്റി ചേർന്നിട്ടുണ്ട്.
ഖത്തർ മ്യൂസിയങ്ങൾ ലോകമെമ്പാടും ശ്രദ്ധ നേടിയിട്ടുണ്ട്. സമകാലിക മിഡിൽ ഈസ്റ്റേൺ മോഡൽ എങ്ങനെ വികസിപ്പിക്കാം എന്നത് പ്രവർത്തികമാക്കുന്നതിൽ ഖത്തർ ഏറ്റവും മുന്നിലാണ്. ഖത്തർ മ്യൂസിയങ്ങൾ വികസിപ്പിച്ചെടുത്ത എല്ലാ മ്യൂസിയങ്ങളും അവയുടെ വാസ്തു വിദ്യാ രൂപകല്പനയിലോ മൊത്തത്തിലുള്ള ആശയത്തിലോ ഇസ്ലാമിക അല്ലെങ്കിൽ ഖത്തരി ഘടകങ്ങൾ ഉൾപ്പെടുത്തിയിട്ടുണ്ട്. ഈ വിധത്തിൽ അത് സ്വന്തം ബ്രാൻഡ് സൃഷ്ടിക്കാൻ ശ്രമിക്കുന്നു. ഖത്തർ ഫൗണ്ടേഷന്റെ കമ്മ്യൂണിറ്റി ഡവലോപ്മെന്റ് പ്രതിഫലനമാണിത്. ഇത് ഒരു പുരോഗമന സമൂഹത്തെ സൃഷ്ഠിക്കുകയും സാംസ്‌കാരിക ജീവിതം മെച്ചപ്പെടുത്തുകയും, ഖത്തറിന്റെ പൈതൃകം സംരക്ഷിക്കുകയും സമൂഹത്തിലെ അടിയന്തിര സാമൂഹിക ആവശ്യങ്ങൾ നിറവേറ്റുകയും ചെയ്യുന്നു.
MIA പാർക്കിൽ സിനിമ പ്രദർശനങ്ങൾ, കായിക ഇവന്റുകൾ, സംഗീത പരിപാടികൾ, പൊതു പരിപാടികൾ എന്നിങ്ങനെയുള്ള പൊതു പ്രവർത്തനങ്ങൾ നടത്തുന്നു. പുതിയ നാഷണൽ മ്യൂസിയം ഓഫ് ഖത്തർ 2019മാർച്ച്‌ 28ന് പൊതു ജനങ്ങൾക്കായി തുറന്നു കൊടുത്തു.
ദോഹ കോർണിഷിന്റെ തെക്കേ അറ്റത്ത് 1.5ദശ ലക്ഷം ചതുരശ്ര അടി സ്ഥലത്തു സ്ഥിതി ചെയ്യുന്ന നാഷണൽ മ്യൂസിയം ഓഫ് ഖത്തർ കെട്ടിടം കടലിൽ നിന്ന് ഉയരുന്നു. രണ്ടു കാൽനട പാലങ്ങളും ഒരു റോഡ് പാലവും കരയുമായി ബന്ധിപ്പിച്ചിരിക്കുന്നു.
ഖത്തർ ഒളിമ്പിക്സ് ആൻഡ് സ്പോർട്സ് മ്യൂസിയം കായിക ചരിത്രം, പൈതൃകം, വീജ്ഞാനം എന്നിവക്കായി ആസൂത്രണം ചെയ്ത ദേശീയ അന്തർ ദേശീയ കേന്ദ്രമാണ്. സ്പോർട്സ്, സ്പോർട്സ് വസ്തുക്കൾ സംരക്ഷിക്കാനും സംഭരിക്കാനും അന്വേഷിക്കാനും പ്രദർശിപ്പിക്കാനും ഇത് ലക്ഷ്യമിടുന്നു. ഓറിയന്റലിസ്റ്റ് കലക്കായി മാത്രം സമർപ്പിക്കപ്പെട്ട ലോകത്തിലെ ഏക സ്ഥാപനമാണ് ഓറിയന്റലിസ്റ്റ് ശേഖരം. പെയിന്റിംഗുകൾ, വാട്ടർ കളറുകൾ, ശില്പങ്ങൾ,ഡ്രോയിങ്ങുകൾ എന്നിവ ഇതിൽ ഉൾപ്പെടുന്നു.
ഖത്തർ മ്യൂസിയങ്ങൾ സംഘടിപ്പിക്കുന്ന താൽക്കാലിക പ്രദർശനങ്ങൾക്കായുള്ള ഇടമയാണ് 2010ൽ QM ഗാലറി സ്ഥാപിച്ചത്. കത്താറ (സാംസ്‌കാരിക ഗ്രാമം )ബിൽഡിംഗ്‌ 10ൽ സ്ഥിതി ചെയ്യുന്ന ഗാലറി, മ്യൂസിയങ്ങൾക്ക് അവരുടെ ശേഖരങ്ങളും പദ്ധതികളും ദർശനങ്ങളും അവതരിപ്പിക്കുന്നതിന്നുള്ള ഒരു വേദിയാണ്.
ഗാലറിയിൽ ഖത്തരി കലാകാരന്മാരുടെ പ്രദർശനങ്ങളും അന്താരാഷ്ട്ര പ്രദർശനങ്ങളും സംഘടിപ്പിക്കുന്നു. ഫോട്ടോഗ്രാഫി, പുരാവസ്തു ശാസ്ത്രം, കല, കായികം, വാസ്തു വിദ്യ, ശില്പം എന്നിങ്ങനെയുള്ള പ്രദർശനങ്ങളുടെ വിപുലമായ ശ്രേണി അനുവാചകരെ സംതൃപ്തരാക്കുന്നു.
ഇസ്ലാമിക് ആർട്ട്‌ മ്യൂസിയത്തിന്ന് അടുത്തായി സ്ഥിതി ചെയ്യുന്ന അൽരിവാബ് ദോഹ എക്സിബിഷൻ സ്പേസ്, ഖത്തർ മ്യൂസിയത്തിന്റെ മറ്റൊരു താൽക്കാലിക പ്രദർശന സ്ഥലമാണ്. മൊത്തം 5000ചതുരശ്ര മീറ്റർ വിസ്തീർണമുണ്ട്.
കലാകാരന്മാർ താമസിക്കുന്ന ഫയർ സ്റ്റേഷൻ സർഗാത്മകതക്കുള്ള ഒരു തുറന്ന ഇടമാണ്. ഖത്തരി ആർക്കിടെക്ട് ഇബ്രാഹിം അൽ ജെയ്ദ രൂപകല്പന ചെയ്ത ഫയർ സ്റ്റേഷനിൽ 24സ്റ്റുഡിയോകളും 700ചതുരശ്ര മീറ്റർ ഗാലറിയും പഴയ ഗാരെജിൽ ഉണ്ട്. ഇത് പ്രോഗ്രാമിൽ പങ്കെടുക്കുന്ന കലാകാരന്മാർക്കും പ്രാദേശിക വാസികൾക്കും ഉപയോഗിക്കാം.
ഖത്തർ മ്യൂസിയം സ്ഥാപിതമായതു മുതൽ സർവേകൾ, ഉൽഖനനങ്ങൾ, പുനരുദ്ധാരണം, പുനരധിവാസ പദ്ധതികൾ തുടങ്ങി നിരവധി വാസ്തു വിദ്യാ സംരക്ഷണ പദ്ധതികൾ നടപ്പാക്കിയിട്ടുണ്ട്. ഈ ശ്രമങ്ങൾ ഖത്തറിൽ ഉടനീളമുള്ള നിരവധി പുരാവസ്തു സ്ഥലങ്ങൾ, കൊട്ടകൾ, ടവറുകൾ, പള്ളികൾ, പഴയ കെട്ടിടങ്ങൾ എന്നിവ കണ്ടെത്താനും രേഖപ്പെടുത്താനും സംരക്ഷിക്കാനും പ്രോത്സാഹിപ്പിക്കാനും സഹായിച്ചു. ഇങ്ങനെ രാജ്യത്തിന്റെ സംസ്കാരവും പൈതൃകവും സംരക്ഷിക്കുന്നു.
UNESCO യുടെ ലോക പൈതൃക കേന്ദ്രമാണ് അൽ സുബാറ. ദോഹയിൽ നിന്ന് ഏകദേശം 100 കിലോമീറ്റർ വടക്ക് പടിഞ്ഞാറായാണ് അൽ സുബാറ സ്ഥിതി ചെയ്യുന്നത്. അൽ സുബാറയിലും അതിന്റെ ഉൾപ്രദേശങ്ങളിലും വലിയ തോതിലുള്ള ഖനനങ്ങളും പുനരുദ്ധാരണങ്ങളും നടന്നു.
പബ്ലിക് ആർട്ട്‌ ഡിപ്പാർട്മെന്റ് കലാ പ്രദർശനങ്ങൾ സംഘടിപ്പിക്കുകയും പ്രശസ്തരായ കലാകാരന്മാരുടെ കലാ സൃഷ്ടികൾ സ്ഥാപിക്കുകയും മേൽനോട്ടം വഹിക്കുകയും ചെയ്യുന്നു. പൊതു ഇടങ്ങളിൽ വിവിധ കലാരൂപങ്ങൾ പ്രദർശിപ്പിക്കുന്നതിലൂടെ പ്രാദേശിക പ്രതിഭകളെ പ്രചോദിപ്പിക്കുകയും കലയും പ്രാദേശിക സമൂഹവും തമ്മിലുള്ള ബന്ധം രൂഢമൂലമാക്കുകയും ചെയ്യുന്നു.
കലകൾ, പുരാവസ്തു ശാസ്ത്രം, ഇസ്ലാമിക ചരിത്രം, പൗരസ്ത്യ പഠനങ്ങൾ എന്നിവയെക്കുറിച്ച് ഖത്തർ മ്യൂസിയങ്ങൾ പതിവായി ഇംഗ്ളീഷിലും അറബിയിലും പ്രസിദ്ധീകരണങ്ങൾ പുറത്തിറക്കുന്നു.
ഞങ്ങൾ ഖത്തറിൽ എത്തിയത് റംസാൻ മാസത്തിലെ അവസാനത്തിലാണ്. ഈദുൽ ഫിത്തർ ഖത്തറിൽ വെച്ച് ആഘോഷിക്കുവാനുള്ള ഭാഗ്യം ലഭിച്ചു. ഈദ് ആഘോഷത്തോടനുബന്ധിച്ചു കോർണിഷ് മേഖല ഗതാഗത നിയന്ത്രണത്തിലായിരുന്നു. ബലൂൺ പരേഡും മാജിക് ഷോയും ഗാനമേളയുമൊക്കെ ആസ്വദിക്കാൻ ഞങ്ങൾക്ക് അവസരമുണ്ടായി. വലിയ ബലമുള്ള ബലൂൺ കൊണ്ട് വ്യത്യസ്ത രൂപങ്ങളുണ്ടാക്കി പരേഡ് നടത്തുന്നു. അത്യാകർഷകമായ ഈ പരിപാടിയിൽ ഞങ്ങൾക്ക് VIP സീറ്റായിരുന്നു ലഭിച്ചിരുന്നത് എന്നത് എടുത്തു പറയേണ്ട കാര്യമാണ്. ഖത്തറിൽ നിന്നും നാട്ടിൽ തിരിച്ചെത്തിയിട്ടും ഖത്തർ ഓർമ്മകൾ മനസ്സിൽ കൂടുതൽ തിളക്കത്തോടെ പ്രശോഭിക്കുന്നു.
